Bisan napildi niadtong Sabado sa gabie, padayon gihapon nga midawat ug pagdayeg ang Gilas Pilipinas sa nahimong nindot nga kampanya sa gisalmotan nga Olympic Qualifying Tournament (OQT).
Kahinumduman nga napildi ang Pilipinas sa crossover semifinals batok sa Brazil, 71-60, bisan sa nindot nga performance niini sa unang katunga nga bahin sa dula.
Daghang mga opisyal sa nasud ug mga basketball fans ang mitimbaya sa national team bisan sa maong kapildihan.
Kahinumduman nga nahimo sa Gilas nga patumbahon ang world No.6 nga Latvia bisan sa pagka-underdog sa Pinoy team.
Bisan ang nakalabang world No. 23 nga Gerogia hapit usab nga gipildi sa Pinoy team, dalan aron musulod sa Semis.
Matud ni Samahang Basketball ng Pilipinas president Al Panlilio, bisag sakit ang resulta sa kampanya sa Gilas, magsilbi kini nga ‘building block’ alang sa musunod nga mga torneyong salmotan sa Pilipinas.
Usa sa mga ginatan-aw sa opisyal mao ang mas pagpakusog pa sa Philippine national team aron mahimong best Asian team ug ma-qualify alang sa 2027 World Cup.
Sunod niini ang musunod nga Olympics (Los Angeles).
Dili usab limod ang gibilin nga marka sa Gilas Pilipinas sa kalibotan sa basketball, sa pagpanguna nilang Justin Brownlee, June Mar Fajardo, Dwight Ramos, ug Chris Newsome.
Bisag wala nakasulod sa Olympics, nagtuo si Panlilio nga maghatag kini ug positibong marka sa Pilipinas, hilabi na sa musunod pa nga turneyo nga salmotan sa Gilas.
