Andam na ang provincial government sa Agusan del Sur kauban ang Department of Education (DepEd-Caraga) alang sa pormal nga pag-abri sa Palarong Pambansa 2026 ugma sa Datu Lipus Makapandong Sports Complex sa Brgy. Patin-ay, lungsod sa Prosperidad.
Ang tanang mga delegado magtapok alas 1 sa hapon, sunod ang air exhibition sa Philippine Air Force alas 3 sa hapon, ug ang pagpakita sa VTR para sa Palaro Tu AgSur 2026 opening billboard.
Alas 4 sa hapon, magsugod ang pagsulod sa mga delegado ug ang pormal nga pag-abiabi kanila, sunod ang pagtugtog sa nasodnong awit ug pag-ampo.
Human niini, ipahigayon ang Caraga ug Agusan marches, ug ang welcome message ni Governor Santiago Cane Jr. Sunod usab ang ceremonial turnover sa athlete’s kits ug handing of banners nga pangunahan ni Gov. Cane ug DepEd Usec Malcolm Garma uban sa mga regional directors.
Sunod niini ang multi-media presentation, pagdagkot sa cauldron, ug ang oath of sportsmanship nga pangunahan ni Olympic gold medalist Hidilyn Diaz.
Matod pa ni Governor Cane, adunay usab mensahe si Pangulong Ferdinand Marcos Jr.
Tapuson ang seremonya pinaagi sa usa ka engrandeng opening show nga magpakita sa mga cheerleaders, hip hop dancers, drum queens, ug mga guest performers.
Napamatud-an usab nga pipila ka adlaw sa wala pa ang opening ceremony, nagsugod na ang ubang mga dula sama sa volleyball, basketball, ug uban pa.
