GENERAL SANTOS CITY- Nagpasalamat ang General Santos City Police Office (GSCPO) sa kooperasyon sa katawhan ug mga nagkadaiyang stake holders hinungdan nga nagmalampuson ang lima ka adlaw nga selebrasyon sa 26th Tuna Festival sa dakbayan.
Nasayran nga gipangunahan sa GSCPO ang pagpatuman sa seguridad sa pagapanguna ni PCol Nicomedes Olaivar Jr. Una nga gibutyag sa maong opisyal nga libuan ka mga law enforcement unit ang gipakatag aron nga magbantay sa seguridad atol sa Tuna Festival.
Sa matag aktibidad nga ginapahigayon matag gabie sa Pioneer Avenue og bisan ang mga kalingawan sa Oval Plaza hugot nga nagbantay ang mga pulis aron luwas ang tanan.
Gipasalamatan usab ni Olaivar ang mga katawhan sa syudad human nga misunod sa ilang mga gipatuman nga mandato.
Nahimong katambayayong sa GSCPO sa pagbantay sa seguridad ang Task Force GenSan rason nga walay mga natala nga dako krimen sa selebrasyon.
