Nakigkonsulta si Iranian President Masoud Pezeshkian kang Pakistani Interior Minister Mohsin Naqvi sa Tehran taliwala sa paningkamot sa Pakistan ug Qatar nga buhion pag-usab ang negosasyon tali sa Iran ug United States.
Ang maong pagbisita ni Naqvi mao na ang iyang ikaunom nga pag-adto sa kapital sa Iran sukad misugod ang gubat sa US ug Israel batok sa maong nasod niadtong Pebrero, human sa report sa Tehran bahin sa ‘intelligence’ nga ilang nadawat nga nagplano ang Amerika og bag-ong pag-atake.
Gipadayag usab sa ‘top security official’ sa Iran nga si Mohsen Rezaei nga nagsumite sila og pito ka bag-ong kondisyon ngadto sa administrasyong Trump aron masugdan pag-usab ang panagsulti ug maablihan ang Strait of Hormuz human mapakyas ang unang kasabutan.
Samtang, milupad paingon sa New York si Iranian Foreign Minister Abbas Araghchi aron motambong sa UN General Assembly, human mihimo og mubo nga ‘stopover’ sa Qatar aron makigsulti sa mga opisyal bahin sa gisugyot nga mubo nga kasabutan o dayalogo uban sa Washington.
