Mitubag ang aktres ug host nga si Anne Curtis sa usa ka netizen nga miingong nagpa-retoke siya human kini magkomento sa iyang hitsura sa usa ka red carpet event.
Gikuwestiyon sa netizen ang hitsura ni Curtis ug giapil pa niini ang iyang anak nga si Dahlia. Sa iyang tubag, gipaklaro ni Curtis nga wala siya nagpa-retoke ug giingong matahom silang duha sa iyang anak.
Matud sa aktres, kasagaran dili siya motagad sa mga negatibong komento batok kaniya sa social media, apan niini nga higayona nakadesisyon siyang motubag ug nagpadala pa og ‘virtual hug’ ngadto sa netizen.
Giingon ni Curtis nga wala siya masayod kung unsay hinungdan sa kasuko sa maong netizen apan mipili gihapon siya nga magpakita og kaayo.
Samtang, daghang fans sa aktres ang mipabor sa iyang maayong pagdumala sa sitwasyon ug misaway sa netizen tungod sa pag-apil sa anak ni Curtis sa iyang komento.
