Managlahi nga nag abot sa lungsod sa Banga, South Cotabato si Vice President Sara Duterte ug DILG Secretary Jonvic Remulla aron susihon ang kahimtang ug maghatag og tabang human sa nahitabong pagpamusil sulod sa usa ka eskwelahan sa maong lugar.
Sa insidente sa Banga National High School, tulo ang namatay, lakip ang menor de edad nga suspek nga nagpusil sa iyang kaugalingon, samtang adunay ubang mga estudyante nga naangol.
Nibisita si Vice President Sara Duterte sa mga pamilya sa mga biktima ug naghatag og pahasubo ug pinansyal nga tabang. Nanawagan usab siya alang sa mas hugot nga seguridad sa mga eskwelahan ug sa pagpalig-on sa “culture of security,” lakip ang hustong guidance ug suporta sa mental health sa mga estudyante.
Samtang, nakigpulong si DILG Secretary Jonvic Remulla sa mga lokal nga opisyal ug kapulisan aron hisgutan ang seguridad sa mga eskwelahan. Lakip sa ilang gisusi kung giunsa pagkupot sa menor de edad nga suspek ang licensed nga armas sa iyang amahan nga gigamit sa insidente.
Tugod niini, nanawagan si Remulla sa dugang nga suporta alang sa security measures sa mga eskwelahan, lakip ang pag-apil sa mga barangay tanod sa pag-monitor sa palibot sa mga tunghaan ug pagpahugot sa pag-monitor sa mga kalihokan sa kabataan sa internet ug social media.
