Nipasalig ang Department of Labor and Employment (DOLE) sa mga mamumuo nga ang mga regional wage boards aktibong nagtuon sa mga petisyon alang sa usbaw sa suholan.
Kini human napakyas ang mga magbabalaod sa pag-aprobar sa gisugyot nga usbaw sa suholan.
Matod ni Labor USec. Benjo Benavidez, nagpadayon ang mga konsultasyon ug pagdungog nga gihimo sa Regional Tripartite Wage and Productivity Boards (RTWPB) alang sa usbaw sa suholan sa mga mamumuo sa mga rehiyon.
Gani, sa National Capital Region, matud niya, nagpadayon na ang proseso sa pagsuta kung kanus-a ug pila ang usbaw sa minimum nga suholan sa rehiyon.
Gipasabot sa kalihim nga base sa nangaging mga higayon, ang mga balaudnon nga wala mapasar isubmit sa sunod nga Kongreso.
Matod niya nga kung mahitabo man kini, andam ang DOLE sa paghimo sa ilang bahin pinaagi sa paghatag sa ilang opinyon ug teknikal nga input alang sa tukma nga paghimo sa balaodnon.
