GENERAL SANTOS CITY – Gikumpirma sa Bureau of Fire Protection – Gensan nga 3 ang kaswalti sa nahitabong sunog kagahapon sa Morales Subdivision, Bogainvilla St., Barangay City Heights, bandang ala una katorse sa hapon.
Giila sa mga otoridad ang mga biktima nga sila Nicky Deanna Belmonte, 42 anyos; Elisha Zayn Belmonte, 3 anyos; ug Klian Zhen Belmonte, 18 anyos nga gikabutyag nga adunay special needs.
Ang mga biktima nakit-an matod pa sa back portion sa ilang panimalay partikular na sa ilang kusinang dapit ug tingali misulay gayod nga makagawas gikan sunog.
Apan, dako ang posibilidad nga napakyas kini tungod wala na sila kaginhawa sa sulod tungod sa kakusog sa aso.
Matod pa ni SFO2 Oliver Alfeche, Arson Investigator sa BFP Gensan, gibana-banaang nagkantidad ug kapin o kulang 100,000 pesos ang kinatibuk-ang danyos sa insidente.
Kasamtangang dili pa mahatag sa BFP Gensan sa pagkakaron ang saktong detalye sa rason sa sunog apan padayon pa ang ilang buhatan sa pag-imbestiga sa nahitabong sunog.
Nanawagan usab ang opisyal sa publiko nga aron makaresponde sila ug tarong ug paspas, hinaot nga tanggalon ang mga sagabal sa dalan ilabi na nga dako ang ilang mga firetrucks.
Giawhag usab ni SF02 Alfeche ang katawhan nga bansayon ang kaugalingon ug ubang miyembro sa pamilya sa angay nga buhaton kung adunay sunog.
Ibalanse ang safety and security sa panimalay.
Nasayran nga asawa matod pa sa usa ka pulis ang 42 anyos nga biktima.
