Anak sa Barangay kagawad angol human nakigpusilay sa kapulisan atul sa buy-bust operation sa GenSan
GENERAL SANTOS CITY – Angol ang usa ka lalaki human matud pa misukol ug nakigpinusilay sa kapulisan atul sa gipahigayong buy-bust operation. Natigayon ang insidente sa Tiongson St. Brgy Lagao ning dakbayan, kung asa gipahigayon sa City Drug Enforcement Unit sa pagpanguna ni Police Senior Inspector Fernando Manuel, ang nasampit nga operasyon.
Giila ang nahisgutan nga si John Rafael Eco Alyas Toto, anak sa usa ka barangay kagawad, taga-Niyog St. Brgy Dadiangas South ning siyudad.
Kasamtangan kining anaa sa talandugon nga kahimtang sa ospital, human nakaangkon ug samad-pinusilan sa ulo.
Una niini, gikabutyag nga positibong napalitan ug shabu si Eco sa kantidad nga usa ka libo ka pesos, dihang miaksyon ug sibat sakay sa iyang pula nga multicab.
Gigukod siya sa kapulisan, kung asa nabanggaan pa niini ang usa ka itum nga Hilux sa dalan.
Dihang miaksyon matud pa nga daw sa may gibunlot ang suspek, giunhan na lamang kini ug tiro sa kapulisan nga maoy hinundgan nga nakaangkon ug samad-pinusulan.
Matud sa usa ka nakasaksi nga mibalibad magpaila, pito ka mga buto sa pusil ang ilang nadunggan.
Gikabutyag nga narekober sa kapulisan ang gigamit nga armas sa suspek.
Samtang, mipalag ang pamilya ni Eco sa nadangatan sa anak, ug gihingusgan nga wala kini bisyo, hilabi na sa iligal nga droga.
Padayon pang giimbestigahan sa kapulisan ang naasoy’ng insidente, samtang padayong nagpaalim sa nasampit nga tambalanan ang nasampit nga suspek.
