Nagpakita og maayong ehemplo sa pagtabang sa isigkatawo ang usa ka regular blood donor nga nahimong unang successful donor sa gipahigayong Dugong Bombo 2026 karong adlawa, Nobyembre 14, sa Robinsons Place GenSan.
Giila ang maong donor nga si Wendell Retes, residente sa Purok 16, Barangay Tinagacan, kinsa miingong nga malipayon siya tungod sa iyang nahimong pagdonar og dugo.
Gibutyag ni Retes nga 34 na ka beses siyang nakadonar og dugo ug dako ang iyang pagtuo sa kaayohan niini isip paagi sa pagtabang sa mga nanginahanglan og dugo.
Giawhag usab niya ang publiko nga dili magduha-duha sa pagdonar og dugo kon kwalipikado, tungod kay dako kini og ikatabang sa isigkatawo ug sa komunidad.
Gibutyag usab ni Retes ang iyang pasalamat sa Bombo Radyo Philippines Foundation, Philippine Red Cross GenSan ug sa mga sponsors nga mitabang sa pagpahigayon sa maong bloodletting activity.
