Andam mohatag og gikinahanglang tabang ang National Bureau of Investigation o NBI kung madala na sa United States si Kingdom of Jesus Christ founder Apollo Quiboloy.
Kini human gipagawas sa Makati City Regional Trial Court ang extradition warrant of arrest batok kang Quiboloy ug sa iyang mga kauban.
Matod ni NBI Director Melvin Matibag, maghulat lamang sila sa mando gikan sa Department of Justice o DOJ.
Gipaabot usab sa NBI nga pormal nga itugyan kanila sa DOJ ang kopya sa extradition warrant.
Gipasabot ni Matibag nga ipasa una nila sa DOJ ang maong dokumento ug ang departamento na ang magdesisyon sa sunod nga lakang.
Kahibaluan nga kagahapong adlawa ,gipagawas sa Makati City RTC ang extradition warrant of arrest ug hold departure order batok sa napriso nang si Quiboloy ug duha pa niyang kauban, human sa petisyon nga gisumite sa gobyerno sa Amerika.
Nagsumikad ang extradition request sa nagkadaiyang kasong giatubang ni Quiboloy sa US, lakip na ang child sex trafficking pinaagi sa pagpamugos, pagpanglimbong ug pagpanghulga, marriage fraud, visa fraud, money laundering ug bulk cash smuggling.
