Nagpagawas og direktiba ang Commission on Elections (COMELEC) Region 12 ngadto sa tanang lokal nga opisina niini nga hatagan og prayoridad ug tukmang pag-atiman ang mga senior citizen, persons with disabilities o PWDs ug mga mabdos nga gustong magparehistro isip botante.
Matud ni Atty. Jeljan Panal, Regional Election Attorney sa COMELEC Region 12, nakadawat na ang ilang regional office sa report kalabot sa insidente nga nahitabo sa voter registration sa General Santos City. Matud pa niya, gimandoan na sa Regional Election Director ang tanang COMELEC offices sa rehiyon nga mangita og paagi aron dili na maglisod og saka sa hagdanan ang mga sakop sa vulnerable sectors.
Gipasabot ni Panal nga magpabilin sa opisina ang main server computer, apan mahimong ibalhin sa ground floor ang ubang computer units aron didto na maproseso ang rehistrasyon sa mga senior citizen, PWDs ug mabdos.
Gikinahanglan usab nga adunay COMELEC personnel sa ubos aron makaila dayon sa mga aplikante nga nagkinahanglan og tabang, ilabi na kadtong maglisod sa pagsaka sa ikaduhang o ikatulong andana sa ilang opisina.
Dugang pa ni Panal, gisusi pa sa ilang opisina ang eksaktong detalye sa insidente, apan ilang giila nga kinahanglan adunay kausaban sa proseso aron masiguro nga ang mga serbisyo sa COMELEC maabot ug mahatag sa tanang botante nga nanginahanglan niini.
