Dakong tabang sa suplay sa dugo sa dakbayan ug sa tibuok nasud ang lig-on nga panaghiusa sa mga nagkadaiyang sektor alang sa tinuig nga bloodletting activity nga “Dugong Bombo,” sumala sa Philippine Red Cross (PRC) General Santos City Chapter.
Gipaambit ni Merlita Gludo, Chapter Administrator sa PRC GenSan, nga pinaagi sa blood letting activity sa Bombo Radyo kauban ang Red Cross, daghan ang nahatagan og hinabang nga nanginahanglan og dugo dili lang sa General Santos City kondili sa tibuok Pilipinas tungod kay dungan man kini nga gipahigayon sa tibuok nasud.
Gipasigarbo usab ni Gludo nga tungod sa maong paningkamot, kanunay nga masulod sa Top 3 ang General Santos City sa tibuok nasud sa pinakadaghang nakolekta nga dugo, diin usahay mosaka pa kini sa pinakaunang pwesto.
Gipasalamatan sa opisyal ang walay puas nga suporta ug pag-promotar sa programa gikan sa nagkadaiyang opisina sa lokal nga panggamhanan (LGU), mga pribadong sektor (non-LGU offices), mga organisasyon, ug ubang mga ahensya nga nahimong yawe sa padayon nga kalampusan sa “Dugong Bombo.”
Ang Dugong Bombo 2026 ipahigayon ugma Nobyembre 14 sa Robinsons GenSan. Ang successful blood donors makadawat ug ‘specially designed’ dugong bombo t-shirt, hot meals og drinks, juice, vitamins, certificate, ug donor’s card.
