Nasakmit sa kapulisan ang usa ka kalibre .38 nga rebolber ug tulo ka buhing bala atol sa pagpatuman sa search warrant sa balay sa usa ka 38-anyos nga lalaki sa Purok Dr. Acharon, Barangay Tambler, General Santos City, alas-1:40 sa hapon niadtong Nobyembre 11, 2026.
Giila ang subject sa search warrant nga si Richard Gorgonio Miñao, 38 anyos, ulitawo ug mangingisda, nga residente sa maong lugar.
Gipatuman sa mga personahe sa Police Station 5, uban ang GSCPO SWAT ug CIT Gensan-RIU 12, ang Search Warrant Number 26-148 nga giisyu ni Executive Judge Dennis A. Velasco sa Regional Trial Court Branch 23 sa General Santos City.
Narekober gikan sa balay sa suspek ang usa ka kalibre .38 nga rebolber nga walay serial number, tulo ka buhing bala sa maong kalibre, ug usa ka itom nga sling bag.
Gipahigayon ang pagmarka, pag-imbentaryo ug pagkuha og litrato sa mga nakuhang ebidensya atubangan sa mga gikinahanglang saksi.
Gitugyan na ang mga nakumpiskang butang ngadto sa investigator-on-case alang sa hustong dokumentasyon ug pagsumite sa forensic laboratory ug Firearms and Ballistics Unit alang sa eksaminasyon.
Ang suspek giimbestigahan tungod sa posibleng paglapas sa Article V, Section 28 sa Republic Act 10591 o balaod batok sa ilegal nga pag-angkon o pagpanag-iya og armas ug bala.
