Gipasalig sa National Food Authority o NFA nga igo ug adunay igong emergency rice allocation ang ilang ahensya taliwala sa hulga sa grabeng El Niño ug sa gilaumang pagdeklara og state of calamity sa pipila ka lokal nga panggamhanan sa nasud.
Base sa opisyal nga rekord sa National Disaster Risk Reduction and Management Council o NDRRMC, kapin na sa 100 ka lokalidad sa nasud ang gideklarang state of calamity tungod sa grabeng hulaw.
Pinakadaghan niini ang natala sa Cagayan Valley nga adunay 66 ka lugar, gisundan sa Caraga Region nga adunay 23 ka lugar.
Matod ni NFA Administrator Larry Lacson, hapsay ug igo pa ang kasamtangang buffer stock sa ilang ahensya nga mokabat og walo ka adlaw nga suplay alang sa tibuok populasyon sa Pilipinas.
Padayon usab ang ilang operasyon sa pagpalit og humay gikan sa mga mag-uuma.
Base sa datos sa ahensya, mokabat sa 292,000 metric tons o bugti sa lima ka milyon ka sako sa bugas ang kasamtangang anaa sa nagkadaiyang bodega sa tibuok nasud.
Bisan pa niini, giila ni Lacson ang mga hagit nga giatubang sa produksyon sa humay human ireport sa Philippine Statistics Authority o PSA ang pagkunhod sa ani, ilabi na ang 650,000 metric tons nga pagkunhod sa ikatulong quarter ug gilauman usab nga mous-os ang produksyon sa ikaupat nga quarter.
Bisan pa sa mga hagit, gipasiugda sa NFA nga andam gihapon ang ilang ahensya ug padayon ang ilang koordinasyon sa mga lokal nga panggamhanan aron masiguro nga dali nga mahatod ang tabang sa mga LGU nga nagkinahanglan og suporta.
