Gipatuman na karong Martes, Nobyembre 10, ang dakong pagmubo sa presyo sa mga produktong petrolyo sa tibuok nasud.
Base sa price adjustment, mikunhod og 16 pesos ug 80 sentimos kada litro ang gasolina, 4 pesos ug 10 sentimos ang diesel, ug 3 pesos ug 70 sentimos ang kerosene.
Gipasabot sa Department of Energy o DOE nga ang dakong pagmubo sa presyo resulta sa pag-ubos sa kantidad sa lana sa international market tungod sa pagluag sa tensyon tali sa Estados Unidos ug Iran.
Samtang, gipasidan-an sa DOE ang mga kompaniya sa lana batok sa hinay-hinay o pautay-utay nga pagpatuman sa dakong rollback, ug gimandoan nga ipatuman kini sumala sa direktiba sa ahensya.
Matod ni DOE Undersecretary Alessandro Sales, mahimong makadawat og show-cause order ug masusi pag-ayo ang mga kompaniya nga mapakyas sa pagsunod sa maong mando.
Gipunting usab sa ahensya nga gikinahanglan ang pagsunod sa direktiba samtang nagpabilin ang “State of Calamity” tungod sa tensyon sa Middle East.
