Gipasiguro sa Department of Trade and Industry o DTI nga dili kinahanglan nga magpanic buying o magtipig og daghang palaliton ang publiko kay igo ang suplay sa mga nag-unang panginahanglanon ug prime commodities aron matubag ang panginahanglan sa merkado.
Matod ni Trade Secretary Maria Cristina Aldeguer-Roque, walay angay kabalak-an ang publiko ilabina karong umaabot ang holiday season tungod kay mipasalig ang mga manufacturer nga dili usbon ang presyo sa ilang mga produkto hangtod sa kataposan sa tuig.
Una nang gipahibalo ni Roque nga magpabiling pareho ang presyo sa 190 ka basic necessities ug prime commodities hangtod Disyembre 31, 2026.
Lakip sa mga produkto nga gibutangan sa DTI og suggested retail price ang de-latang sardinas, gatas, kape, pan, instant noodles, asin, bottled water, detergent, sabon panglaba ug kandila.
Apil usab niini ang luncheon meat, meat loaf, corned beef, beef loaf, seasonings, sabon ug battery.
Matod sa kalihim, adunay departamento sa DTI nga nagmonitor sa presyo sa mga pagkaon ug uban pang produkto aron masiguro nga walay pag-usab sa presyo niining 190 ka produkto.
Gipasalig usab sa mga manufacturer nga dili nila pakunhoran ang gidaghanon, timbang o sukod sa mga produkto bisan pa og magpabiling pareho ang presyo niini, aron malikayan ang gitawag nga ‘shrinkflation’.
