Giawhag sa Philippine Rice Research Institute o PhilRice ang publiko nga magsugod sa pagkaon og mas gamay nga bahin sa kan-on, sama sa half cup matag kaon, aron malikayan ang pag-usik sa bugas.
Kabahin kini sa kampanya sa ahensya atol sa pagsaulog sa National Rice Awareness Month karong Nobyembre.
Base sa datos sa Department of Agriculture, gibanabana nga hapit duha ka kutsara nga kan-on ang mausik sa matag Pilipino kada adlaw, nga mokabat sa 9.69 ka kilo matag tuig.
Sa kinatibuk-an, mokabat sa 542,477.6 metriko tonelada nga bugas ang mausik matag tuig sa tibuok nasud.
Katumbas kini sa gidaghanon sa bugas nga mahimong makapakaon sa dul-an sa 5.17 milyong Pilipino sulod sa usa ka tuig.
Giawhag usab sa PhilRice ang publiko nga suportahan ang lokal nga mga mag-uuma pinaagi sa pagpalit sa lokal nga produkto nga bugas.
Gidasig usab sa institusyon ang mga Pilipino nga mopili og mas masustansiyang klase sa bugas isip kabahin sa pagmintinar sa hustong nutrisyon ug pagtabang sa pagsulbad sa problema sa malnutrisyon sa nasud.
