Gipasanginlan sa gobyerno sa France ang Islamic Revolutionary Guard Corps (IRGC) sa Iran nga maoy responsable sa sunod-sunod nga cyberattack nga nakaapekto sa mga refrigerator ug freezer sa mga supermarket sa ilang nasud niadtong miaging bulan.
Matod ni French Foreign Minister Jean-Noël Barrot, wala pa kini masinati kaniadto tungod sa kadako ug kakusog sa maong cyberattack. Gipasidan-an usab niini nga patawan og silot ang mga responsable sa insidente.
Tungod niini, gipatawag sa gobyerno sa France ang embahador sa Iran sa Paris aron ipahayag ang ilang protesta batok sa maong pag-atake.
Base sa imbestigasyon, niadtong Oktubre 11, nakontrolar sa mga hacker ang software nga nagdumala sa temperatura sa mga cooling unit sa kapin 100 ka Coopérative U supermarkets ug 180 ka establisemento sa Intermarché ug Netto.
Miabot sa 50 degrees Celsius ang temperatura sa pipila ka freezer sulod lamang sa usa ka gabii, hinungdan sa pagkadaot sa daghang toneladang frozen food. Gisalikway usab sa pipila ka Iranian media outlets ang mga akusasyon ug gihulagway kini nga walay basihanan.
