Tulo ka oil tanker ang mibuto ug nasunog ning Domingo samtang naglawig sa Strait of Hormuz, sumala sa Islamic Revolutionary Guard Corps (IRGC) sa Iran.
Sa pahayag sa IRGC, giingon niini nga milabay ang mga tanker sa ruta nga wala tugoti sa Iran. Apan wala hinganli sa grupo ang mga barko ug wala usab tukia ang mga nasud diin kini naggikan.
Lahi usab nga gitaho sa usa ka British maritime agency nga adunay tanker nga nasunog niadtong Sabado sa bahin sa Strait of Hormuz, duol sa Khasab, Oman, hinungdan nga gipabakwit ang mga tripulante niini. Usa pa ka tanker ang naigo usab sa wala pa mailhing butang.
Samtang, gikumpirma sa state media sa United Arab Emirates nga 22 ka tawo ang naluwas gikan sa usa ka barko nga nasunog sa Gulf of Oman ug anaa sa maayong kondisyon ang mga tripulante. Apan wala pa makumpirma kung managlahing insidente ba kini o adunay koneksyon sa usag usa.
Sukad misikad ang gubat sa Iran sa ulahing bahin sa Pebrero, hugot nang gilimitahan sa Tehran ang pag-agi sa mga barko sa Strait of Hormuz ug gimandoan ang mga kini nga mogamit lamang sa mga rutang gitugotan niini.
Isip tubag, nagpatuman ang Estados Unidos og naval blockade sa mga pantalan sa Iran ug mitabang sa mga oil tanker nga makaagi sa Strait of Hormuz.
