Gi-awhag sa Commission on Elections o Comelec ang mga kwalipikadong botante nga sayo nang magparehistro ug dili na hulaton ang deadline alang sa 2028 National and Local Elections.
Magsugod ang voter registration karong Martes, Nobyembre 10, ug molungtad hangtod Hunyo 30, 2027.
Matod ni Comelec Chairperson George Garcia, mas maayo nga sayo nang magparehistro ang publiko aron malikayan ang pagdagsa sa mga aplikante samtang nagkaduol ang deadline.
Gipasabot ni Garcia nga sayo nga giablihan ang registration period tungod sa pagpalangan sa Barangay and Sangguniang Kabataan Elections o BSKE nga orihinal nga gitakdang ipahigayon niadtong Nobyembre 2, 2026.
Nahinumdoman nga gipamatud-an sa Supreme Court ang konstitusyonalidad sa balaod nga nagpalugway sa termino sa mga opisyal sa barangay ug SK gikan sa upat ngadto sa lima ka tuig, ug nagtakda sa Nobyembre 2028 isip bag-ong iskedyul sa BSKE.
Gibanabana nga mokabat sa 74 milyon ang mga rehistradong botante nga moapil sa 2028 National and Local Elections.
