Anaa na sa 90 hangtod 95 porsiyento na ang kaandam sa Pilipinas alang sa pag-host sa Association of Southeast Asian Nations o ASEAN Summit nga ipahigayon sa Nobyembre 15 hangtod 17.
Matod ni Executive Secretary ug ASEAN National Organizing Council Chairman Ralph Recto, ang nahibiling pagpangandam nakapunting na lamang sa mga contingency plan, lakip na ang posibleng epekto sa panahon ug katapusang mga pagsiguro sa seguridad.
Personal nga gisusi ni Recto niadtong Biyernes ang mga pagpangandam sa Philippine International Convention Center sa Pasay City nga magsilbing pangunang venue sa summit.
Gilauman nga motambong sa maong panagtigom ang kapin sa 20 ka lider gikan sa mga nasud nga sakop sa ASEAN ug ilang mga dialogue partner.
Gibutyag usab ni Recto nga aktibong gibantayan nila ni Pangulong Ferdinand Marcos Jr. ug First Lady Liza Marcos ang mga pagpangandam alang sa maong kalihokan.
Kabahin usab sa pagpangandam ang pagpaila sa kultura ug lokal nga industriya sa Pilipinas ngadto sa mga langyawng delegado, lakip na ang pagbisita sa pipila ka opisyal sa ASEAN sa Marikina Shoe Museum.
Atol sa pagbisita, nasaksihan sa mga delegado ang aktuwal nga paghimo og sapatos ug ang kasaysayan sa industriya niini sa Marikina nga nailhan isip Shoe Capital of the Philippines.
