Gidawat na sa Senate Impeachment Court ang listahan sa mga ebidensiya ug dokumentong gisumite sa prosekusyon batok kang Vice President Sara Duterte.
Lakip sa mga gidawat nga dokumento ang Statement of Assets, Liabilities and Net Worth o SALN ni Duterte gikan sa 2007 hangtod 2021, mga rekord gikan sa Securities and Exchange Commission o SEC, ug Philippine Government Electronic Procurement System o PhilGEPS.
Apil usab niini ang mga rekord sa iyang bank accounts, insurance ug investment companies, ingon man ang mga dokumento gikan sa Bureau of Internal Revenue o BIR ug uban pang opisyal nga papeles.
Apan limitado lamang sa korte ang paggamit sa mga ebidensiya ubos sa Article II sa impeachment complaint nga may kalabotan sa alegasyon sa unexplained wealth.
Giklaro sa korte nga ang mga SALN gikan sa 2007 hangtod 2021 gamiton lamang isip basihanan sa pagsusi sa pinansiyal nga kahimtang ni Duterte sa wala pa siya nahimong bise presidente niadtong Hunyo 30, 2022.
Matod ni court spokesperson Atty. Reginal Tongol, dili mahimong gamiton ang maong mga dokumento aron pamatud-an ang bulag nga mga alegasyon batok sa bise presidente nga nahitabo sa wala pa ang maong petsa.
Wala usab tugoti sa impeachment court ang paggamit sa mga rekord sa Commission on Audit o COA kalabot sa mga disallowance sa confidential funds nga kabahin sa Article I nga gibawi na sa prosekusyon.
Gipasabot ni Tongol nga ang pagdawat sa korte sa maong mga dokumento wala magpasabot nga napamatud-an na ang mga alegasyon sa prosekusyon batok kang Vice President Sara Duterte.
