Gihugtan sa National Capital Region Police Office o NCRPO ang kampanya batok sa ilegal nga koneksiyon sa tubig taliwala sa epekto sa El Niño phenomenon sa nasud.
Misunod kini sa mando ni NCRPO chief Police Brigadier General Christopher Abrahano sa lima ka police district sa tibuok Metro Manila nga palig-onon ang operasyon batok sa mga indibidwal ug grupo nga nagpahimulos sa taas nga panginahanglan sa suplay sa tubig.
Gibantayan sa mga kapulisan ang posibleng mga pamaagi sa ilegal nga pagkonektar sa linya sa tubig, lakip na ang mga konsumidor nga gustong makakuha og libreng suplay pinaagi sa dili awtorisadong koneksiyon.
Gimandoan usab ni Abrahano ang mga police unit nga palig-onon ang koordinasyon sa mga water concessionaire, local government units ug mga opisyal sa barangay aron mailhan ug mabantayan ang mga lugar nga posibleng maapektuhan sa maong ilegal nga kalihokan.
Gipasiguro usab sa heneral nga adunay angay nga plataporma aron dali nga mareport sa publiko ang mga ilegal nga koneksiyon, matubag dayon ang mga reklamo ug mapahigayon ang hiniusang inspeksiyon kon gikinahanglan.
Gimandoan usab ang matag kapulisan nga tukion ug kasuhan ang mga tigpondo sa maong ilegal nga operasyon, ilabina ang mga nangolekta og bayad ug nagpadagan sa mga dili awtorisadong koneksiyon sa tubig.
