Makadawat og katumbas sa usa ka buwang suweldo ug P5,000 nga cash gift ang mga kwalipikadong kawani sa gobyerno human maggahin ang Department of Budget and Management (DBM) og kinatibuk-ang P82.9 bilyon alang sa ilang year-end benefits.
Gibahin ang maong pondo ngadto sa P73.449 bilyon alang sa year-end bonus ug P9.549 bilyon alang sa cash gift. Matud ni DBM Secretary Kim Robert C. De Leon, gipagawas na sa ilang departamento ang pondo ngadto sa nagkadaiyang ahensya sa gobyerno ug gipaabot nga madawat kini sa mga kawani kauban sa ilang unang suweldo karong Nobyembre.
Kwalipikado nga makadawat sa benepisyo ang mga kawani nga nakatrabaho og labing menos upat ka bulan o 120 ka adlaw gikan Enero 1 hangtod Oktubre 31, 2026, sa national o local government.
Matud pa ni De Leon, dakong tabang ang maong bonus ug cash gift sa mga kawani ug ilang pamilya, ilabi na karong nagkaduol na ang Pasko, isip pag-ila sa ilang kakugi ug serbisyo sa publiko.
