GENSAN- Gisuspenso karong Miyerkules, Oktubre 28, 2026, ang face-to-face classes sa tanang lebel sa mga pampubliko ug pribadong eskwelahan sa General Santos City ug Sarangani Province, human sa mga linog nga miigo karong adlawa.
Una nga natala ang linog dakong alas-7:43 ning buntaga, nga ang sentro nahimutang sa Balut Island, Municipality of Sarangani, Davao Occidental.
Sa General Santos City, gibati ang linog sa Intensity III, samtang dunay pipila ka lungsod sa Sarangani Province nga nakasinati usab sa pag-uyog sa yuta.
Gisundan kini sa magnitude 5.4 nga linog dakong alas-9:11 ning buntaga, nga ang sentro nahimutang gihapon sa maong lugar. Tungod niini, pipila ka bahin sa Mindanao ang nakasinati usab sa pag-uyog sa yuta.
Base sa pahibalo sa City Government of General Santos, gisuspenso usab ang trabaho sa tanang opisina sa lokal nga kagamhanan isip lakang sa pag-amping ug aron masiguro ang kaluwasan sa publiko.
Giawhag usab ang mga residente nga magpabiling kalmado ug mabinantayon, mag-amping, ug mosunod sa mga opisyal nga pahibalo ug panudlo sa mga hingtungdang awtoridad.
