Giduso ni National Anti-Poverty Commission (NAPC) Secretary Manny Pacquiao ang pagpalig-on sa mga programa sa pabahay ug panginabuhian aron masiguro nga adunay maayong puy-anan ug lig-on nga panginabuhian ang matag pamilyang Pilipino.
Kini ang panawagan sa opisyal atol sa iyang pagtambong sa Mindanao Development Forum 2026 sa Davao City, diin iyang gipasiugda ang kamahinungdanon sa pagtubag sa nag-unang mga panginahanglan sa mga komunidad.
Sumala kang Pacquiao, base usab sa iyang kaugalingong kasinatian kaniadto, lisod ang adlaw-adlaw nga pagkinabuhi nga puno sa kabalaka ug walay kasigurohan kon adunay makaon o kapuy-an, busa tumong niya nga ipahilayo ang mga Pilipino sa maong matang sa kalisod.
Padayon usab nga gipalig-on ang koordinasyon sa nagkalainlaing ahensya ug sektor aron masiguro nga dali rang maangkon sa katawhan ang mga serbisyo nga makahatag og lig-on nga pundasyon sa ilang panginabuhi.
Tumong sa mga lakang nga gipaluyohan ni Pacquiao nga mahatagan ang mga Pilipino og desenteng puy-anan ug igong kita aron hingpit silang makabangon gikan sa kalisod.
