Mibisita sa Pilipinas ang professional pickleball player ug world number two nga si Anna Bright isip kabahin sa iyang duha ka adlaw nga pagbisita sa Manila niadtong Oktubre 26 ug 27.
Mainitong gidawat sa mga lokal nga mahiligon sa pickleball si Bright sa SM Mall of Asia Music Hall niadtong Martes, Oktubre 27, diin nakigdula usab siya sa pipila sa iyang mga fans.
Gipahayag ni Bright nga talagsaon ang pagdawat ug suporta sa Filipino pickleball community. Iyang nakita ang dakong potensyal sa paglambo sa maong dula sa Pilipinas tungod sa nagkadaghan nga pickleball courts ug sa pagdaghan sa mga tawo nga ganahang motan-aw niini. Matod niya, mga timailhan kini nga nagkadako ang interes sa pickleball dili lamang sa Pilipinas kondili sa tibuok Asya.
May kalabotan usab ang iyang pagbisita sa pagpangandam sa Pilipinas isip host country sa unang PPA Asia Tour events nga ipahigayon sa sunod tuig.
Nakatakdang ipahigayon ang PPA 125 sa Enero 14 hangtod 18, 2027, nga sundan sa PPA 500 Manila Open sa Pebrero 25 hangtod 28, 2027 sa Pasig City.
Samtang, matod ni sports executive ug kanhi chairman sa Philippine Sports Commission nga si Dickie Bachmann, maayong oportunidad alang sa mga lokal nga magdudula ang pag-host sa Pilipinas sa mga internasyonal nga torneyo sa pickleball. Pinaagi niini, mas mapaduol ang maong dula sa mga lokal nga atleta nga kaniadto kinahanglan pang mobiyahe sa ubang nasud aron makaapil sa mga kompetisyon.
