Gipahayag ni Atty. Dominador Lagare nga ang usa ka hulga mahimong matawag gihapon nga threat bisan pa og kini conditional o adunay kondisyon.
Sumala kang Lagare, dili lamang ang porma o pagkasulti sa pamahayag ang gikonsiderar sa National Bureau of Investigation o NBI, kundili apil ang kapasidad sa usa ka tawo nga tumanon o buhaton ang maong hulga.
Matod pa niya, importante nga matino kung adunay kapasidad ug posibilidad ang nagpagawas sa pamahayag nga himuong tinuod ang hulga.
Kini may kalabotan sa pahayag ni Vice President Sara Duterte nga conditional lamang ang iyang gihimong statement.
Apan sumala sa legal nga pagtan-aw ni Lagare, ang pagka-conditional sa usa ka pamahayag dili awtomatikong nagpasabot nga mawagtang o mahupay ang usa ka kaso sa grave threats.
