Nagpasidaan ang militar sa China kaniadtong Domingo batok sa giingon nga “paghagit” sa Pilipinas sa West Philippine Sea (WPS), samtang nagpatrolya sa rehiyon.
Matod sa tigpamaba sa Southern Theater Command sa militar sa China, kinahanglang hunungon dayon sa Pilipinas ang mga aksyon niini nga giingong nakapasamot sa tensiyon.
Kahinumdoman nga nisamot ang tensyon tali sa Pilipinas ug China tungod sa panagbangi sa teritoryo sa WPS nga sagad moresulta sa panagbangga sa mga barko sa coast guard ug sa dinagkong naval exercises.
Kalabot niini, wala pa motubag ang Philippine Maritime Council ug Armed Forces of the Philippines (AFP) sa pamahayag sa China, ingon man ang embahada sa Pilipinas sa Beijing.
Samtang, gipahibalo sa U.S. ang Indo-Pacific Command nga ang Japan, Pilipinas, ug Estados Unidos nagpahigayon ug joint maritime drills sulod sa Philippine Exclusive Economic Zone gikan Huwebes hangtod Sabado aron palig-onon ang kooperasyon sa rehiyon ug ipasiugda ang “free and open Indo-Pacific.”
Ang Estados Unidos miinsistir nga nagpadayon kini sa pagtuboy sa katungod sa kagawasan sa paglawig ug paggamit sa kadagatan ug kahanginan subay sa international law.
Gisubli ni US Secretary of State Marco Rubio ang suporta sa America alang sa Pilipinas ug gisaway ang “destabilizing plan” sa China sa usa ka gilalisan nga isla sa rehiyon.
