Gilauman nga ihikling gikan sa Gaza ngadto sa United Kingdom (UK) sa umaabot nga Dominggo ang anaa sa 30 ngadto 50 ka mga batang adunay sakit ug mga samaron sa aron makadawat og medikal nga pagtagad.
Kini ang unang higayon nga ang UK nagdala sa mga bata sa Palestine ubos sa usa ka opisyal nga operasyon sa gobyerno, nga gi-coordinate sa Foreign Office, Home Office, ug Department of Health.
Ang pagpili sa mga bata ipahigayon sa World Health Organization (WHO), ug ubanan sila sa mga kabanay nga mosuporta kanila diin ipahigayon ang biometric screening.
Ang lakang nagsunod sa usa ka panawagan sa 96 nga mga miyembro sa parliamento gikan sa tibuok nga linya sa partido alang sa dinalian nga tabang alang sa mga bata nga nanginahanglan medikal nga atensyon, taliwala sa hapit nga pagkahugno sa sistema sa kahimsog sa Gaza.
Ubay-ubay nga mga bata ang nadala kaniadto sa UK pinaagi sa usa ka pribadong organisasyon apan kini ang unang opisyal nga programa sa gobyerno taliwala sa nagkagrabeng panagbangi sa rehiyon.
Wala pa’y saktong mga detalye kung asa nga nasud ang mahimong transit point, pila ang ihikling, o kung adunay sunod nga grupo sa UK.
Tungod sa kalisud sa pagbalik sa Gaza, posible nga ang pipila niini nga mga bata mosulod sa UK asylum system human sa pagtambal.
Samtang, base sa datos sa UNICEF, kapin sa 50,000 ka Palestinian nga mga bata ang namatay o nasamdan sukad sa pagsugod sa gubat kaniadtong Oktubre 2023. Kapin sa 60,000 ka mga tao ang gitaho nga namatay sa Gaza sumala sa Hamas-run health ministry.
Kahinumduman nga ang opensiba sa Israel maoy tubag sa pag-atake sa Hamas sa Israel kaniadtong Oktubre 7, 2023, diin gibana-bana nga 1,200 ka tao ang namatay ug 251 ang nadakpan.
