Nakuha sa mga Filipino Curlers ang labing una nga gold medal sa Asian Winter Games human gipildi ang South Korean team sa Finals match, Pebrero-14.
Gidomina sa Pinoy team nga gilangkoban nilang Marc Pfister, Christian Haller, Enrico Pfister, Alan Frei, og Benjo Delarmente ang nahimong dula og nabulsa ang 5-3 win batok sa mga Korean.
Gipahigayon ang championship match sa Pingfang Curling Arena kung asa paboritong modaog ang SoKor team.
Unang gipildi sa mga Filipino curler ang host country nga China sa semifinals sa score nga 7-6 samtang gitambakan usab sa South Korea ang Hong Kong sa score nga 13-2.
Kini ang unang higayon nga makakuha ang Pilipinas og medalya sa winter sports competition gikan nga nagsugod kini niadtong 1990.
Gikonsidera usab sa SoKor nga usa ka dakong upset ang nahitabo human nila mamintina ang limpyo nga rekord sa group round og otomatikong na-qualify sa semis.
Sa tibuok resulta sa maong event, gold medal ang mabitbit sa Pilipinas, silver sa SoKor, samtang bronze medal usab ang nabulsa sa host country nga China human niini gipildi ang Hong Kong sa 1st runner-up match.
