Nagpadayon ang mga Local Government Units o LGUs ug Municipal Disaster Risk Reduction and Management Offices o MDRRMOs sa SOCCSKSARGEN sa mga tigum ug contingency planning isip pagpangandam sa posibleng epekto sa very strong El Niño sa rehiyon.
Sumala kang Binrio Biñan, Station Chief sa PAGASA General Santos, gitumong sa maong mga lakang ang pagpanalipod sa katawhan ug pagpakunhod sa posibleng kalisod nga mahimong dala sa kanihit sa suplay sa tubig.
Lakip sa mga ginatutokan sa mga lokal nga panggamhanan ang padayong koordinasyon tali sa nagkadaiyang ahensya ug sektor aron masiguro ang kahandam sa mga pasilidad ug suplay sa tubig.
Gipangandaman usab ang pag-apod-apod og relief assistance alang sa mga pamilya ug mag-uuma nga posibleng maapektuhan sa taas nga panahon sa kahuwaw.
Matod sa PAGASA, gilauman nga maabot ang peak sa El Niño tali sa Enero ug Abril sa sunod tuig, apan gihangyo na ang publiko nga magsugod karon pa lang sa pagdaginot sa paggamit sa tubig.
Gipasiugda sa ahensya nga ang sayong pagpangandam ug responsable nga paggamit sa tubig makatabang sa pagpakunhod sa posibleng epekto sa El Niño sa mga panimalay, agrikultura ug panginabuhian sa rehiyon
