Hingpit ng gidakop si South Korean President Yoon-Suk Yeol karong adlawa, Miyerkules, Enero 15 tungod sa pagkuwestiyon kalabot sa mga kaso sa insureksyon batok kaniya nga may kalabotan sa iyang deklarasyon sa martial law niadtong Dec. 3.
Kini ang ikaduhang pagsulay sa pagdakop kang Yoon human napakyas ang iyang kanhing pagdakop niadtong Enero 3 tungod sa iyang presidential security service nga nibabag sa mga imbestigador gikan sa Corruption Investigation Office for High-ranking Officials (CIO).
Matod sa mga imbestigador, ilang gi-serve ang warrant of arrest kang Yoon alas 10:33 sa buntag lokal nga oras o alas 9:33 sa buntag (oras sa Pilipinas) karong Miyerkules.
Sa usa ka pahayag, si Yoon miingon nga siya miboluntaryo sa pag-apil sa mga imbestigador aron malikayan ang kapintasan human kapin sa 3,000 ka mga pulis ang miadto sa iyang presidential residence aron pagdakop kaniya kaganihang buntag.
Si Yoon ang unang naglingkod nga Presidente sa South Korea nga gidakop sa tibuok kasaysayan sa nasod.
Kahinumdoman kagahapon, nagsugod ang impeachment trial ni Yoon apan natapos dayon human sa 4 minutos tungod sa wala pagtambong ni Yoon.
