Gisaway sa Foreign minister sa North Korea ang plano nga pagbaligya sa US sa mga Apache helicopters sa South Korea. Kini subay sa taho sa state media niini diin nanumpa nga mohimo ug dugang nga mga lakang aron mapalig-on ang pagdepensa sa ilang nasud.
Namahayag ang Pentagon kaniadtong Lunes nga giaprobahan sa US State Department ang potensyal nga pagbaligya sa mga Apache helicopters ug may kalabutan sa support and logistics sa South Korea sa gibanabanang balor nga $ 3.5 billion.
Usa ka wala hinganli nga senior official nga nagdumala sa foreign news sa foreign ministry sa North Korea nagpagawas sa usa ka pamahayag kaniadtong Huwebes nga nagsaway sa plano sa pagbaligya tungod usa kini ka lakang sa pagpasamot sa tenson sa rehiyon, kauban ang nagpadayong tinuig nga pagbansay sa militar sa mga kaalyado niini.
