GENERAL SANTOS CITY – Anaa na sa state of decomposition dihang nakaplagan ang patayng lawas sa usa ka babaye sa daplin sa dalan duol sa kasagbutang bahin sa Reformville, barangay Calumpang ning syudad.
Gikabutyag nga girespondihan sa mga otoridad ang lugar gikan sa taho sa duha ka concerned citizen bandang 4:15 sa hapon ning adlawa, Agosto 18, 2024.
Sumala sa inisyal nga imbestigasyon sa kapulisan sa Police Station 10, ang naasoy nga babaye may sul-ob nga maong nga short, brown t-shirt, ug pink sandals.
May tattoo usab kini sa tuo nga bahin sa iyang hawak.
Pinasubay usab sa presensya sa SOCO, nakaplagan usab sa lugar ang usa ka green nga grocery bag, masking tape ug nylon nga pisi nga gihikot sa liog ug tiil sa biktima.
Lakip sa nakaplagan ang itom nga bed sheet, malong, floor mat, sako nga baname, ug duha (2) ka tshirts.
Nanawagan ang mga kapulisan sa mga nakaila o kung may missing nga personahe sa ilang lugar nga makig-alayon ug mamahimong mudangop sa Police Station 10.
Kasamtangan nagapadayon ang imbestigasyon sa kapulisan sa maong krimen.
