GENSAN- Nakompiska sa Police Regional Office 12 o PRO-12 ang 565 ka dagkong kahon sa sigarilyo nga gibanabanang mokantidad og P410,000 atol sa 136 ka operasyon batok sa smuggling gikan Oktubre 12 hangtod 18, 2026.
Base sa accomplishment report sa kapulisan, 44 ka indibidwal ang nadakpan atol sa maong mga operasyon.
Samtang, gikan Enero 1, 2025 hangtod Oktubre 18, 2026, mikabat na sa 3,485 ang mga operasyon sa PRO-12 batok sa ilegal nga pagpasulod sa sigarilyo, diin 1,660 ka tawo ang nadakpan.
Mokabat na usab sa kapin P243.6-Million ang kinatibuk-ang bili sa 756,230 ka yunit sa mga sigarilyong nakompiska sa maong panahon.
Matod ni PBGEN Alan B. Manibog, regional director sa PRO-12, padayon nilang palig-onon ang operasyon ug koordinasyon sa mga may kalabotang ahensya aron mapugngan ang pag-apod-apod sa mga sigarilyong gipasulod sa nasud nga supak sa balaod.
Dugang pa niya, dili lamang kini bahin sa pagpatuman sa balaod, kondili lakip usab sa paningkamot nga mapanalipdan ang panginabuhian, kaluwasan ug kaayohan sa mga komunidad.
