GENSAN- Gisiguro ni Ana Marie Samandel, Bombo International Correspondent sa France, nga luwas ang mga Pilipino nga nagpuyo sa maong nasud taliwala sa nagkagrabeng mga protesta sa mga estudyante, trabahante ug sektor sa mga mamumuo batok sa pagsaka sa presyo sa mga palaliton ug gasolina, ingon man sa mga problema sa edukasyon ug pampublikong serbisyo.
Matod ni Samandel, bisan dili kaayo makita sa mga balita ang grabeng kagubot, mas mabati ang kahimtang sa mismong lugar diin daghang tawo ang nasamdan ug naguba ang mga kabtangan.
Giklaro niya nga nahibalo ang mga Pilipino sa mga lugar nga delikado, hinungdan nga daghan kanila ang mipili nga magpabilin na lang sa ilang mga balay imbes nga mogawas.
Dugang pa niya, peligroso usab ang pagbiyahe sa pipila ka lugar tungod sa kawalay transportasyon. Bisan pa sa kagubot, nag-amping ang mga Pilipino ug naglikay sa mga lugar diin adunay nagpadayong protesta.
