GENSAN- Giklaro sa City Health Office kon CHO-Gensan nga temporaryo lamang ang mga kasagarang reaksyon sa lawas sa mga bata human mabakunahan ubos sa Bakuna Eskwela 2026 o School-Based Immunization (SBI) Program.
Lakip sa kasagarang reaksyon ang hilanat, kasakit o paghubag sa bahin nga giturukan, ug kalipong, nga kasagaran mawala ra sulod sa mubo nga panahon.
Bisan pa niini, giawhag sa ahensya ang mga ginikanan nga bantayan ang kahimtang sa ilang mga anak human sa pagbakuna.
Kung makasinati ang bata og dili kasagaran o grabeng reaksyon, kinahanglan dayon kining ipahibalo sa health worker o dad-on sa labing duol nga pasilidad sa panglawas aron masusi ug mahatagan sa hustong pag-atiman.
Giawhag usab sa CHO ang mga ginikanan nga pabakunahan ang ilang mga anak aron mapanalipdan ang ilang panglawas ug kaugmaon batok sa mga sakit nga mapugngan pinaagi sa bakuna.
