GENERAL SANTOS CITY – Nabalaka karon ang mga anaa sa buhatan sa maayong panglawas human mahibal-an nga may mga lugar nga gitangtang na ang pagpatuman sa pagsul-ob ug facemask sa ilang mga lumulopyo.
Sumala kang Doctor Jett Oco ang Department head sa City health Office nga dili angayang walaon ang pagsul-ob ug facemask gumikan usa kini ka dakong tabang nga maprotektahan ang kinabuhi sa usa ka indibidwal nga dili dayun matakdan sa bisan usang sakit nga dala sa makamatay nga virus.
Sumala kaniya nga daghan ang naprotektahan tungod sa pagsul-ob ug face mask mapa bata o anaa sa hamtong nga pangidaron dili lamang batok sa covid-19 virus kundili bisan sa ubang mga sakit sama sa asthma ug daghan pa.
Gihingusgan ni Dr. Oco nga angayang maminaw sa mga tambag sa eksperto sa panglawas hilabi pa nga wala pa nahuman ang pakigbatok sa maong virus.
Kahibaluan nga may mga pipila na ka lugar sa gawas sa nasud ang nagpatuman sa pagtangtang ug facemask apan nagresulta lamang kini sa pagbalik ug pagtaas sa kaso sa covid-19 virus.
