GENERAL SANTOS CITY – Hugot ang pakig-alayon sa kapulisan sa pamilya ug kabanay sa traysikel driver nga labing una nga biktima sa pagpamusil ning syudad ning bulan sa Hunyo.
Ang biktima giila nga si Nicolas Mesias Albutra, 55 anyos minyo ug residente sa Blk 10, Lot 1, Prk. Opringville, Brgy. Calumpang.
Nagpadayon pa ang gihimong imbestigasyon sa General Santos City Police Office (GSCPO) aron maresolba ang kaso sa pagpamusil sa dakbayan apan sa karon blangko pa sa anggulo sa motibo sa insidente.
Sa pakighinabi sa Bombo Radyo kang Carmen Tadis, igsuon sa biktima, gibutyag niini nga walay sala ang iyang manghod og nanghinaut kini nga makunsensya ang duha ka wala mailhing responsable.
Una niini, gibutyag ni Marivic Albutra nga buotan og walay nasulti ang iyang bana nga adunay nakalaban o nasuko kaniya.
Kahibaluan nga sakay ang biktima sa gimaneho niining tricycle sa dihang gipusil kini sa motorcyle-riding suspect, alas 11:15 kagahapon sa buntag adlaw nga Martes.
Dead on the spot ang biktima human nga nakaangkon og samad pinusilan sa ulo.
