GENERAL SANTOS CITY – Nagpabilin gihapon ang paglaum sa pamilya Rojas nga adunay maayong resulta ang gipahigayong imbestigasyon sa kapulisan sa pagkawala ni PO1 Cristine Joy Rojas.
Matud pa ni Atty. Remegio Rojas, nagmando na si PNP Chief Police Gen. Camilo Cascolan sa kapulisan nga tutukan ang kalabot kang PO1 Rojas kansa gilambigit sa investment scam nga Police Paluwagan Movement (PPM).
Nasuta nga nawala ang maong pulis Marso 2019 dihang gisugdan nga giimbestigahan ang PPM.
Gibutyag ni Atty. Rojas, kung walay resulta sa imbestigasyon sa pag-umangkon mudangop na sila sa Senado.
Dugang pa sa nasampit, adunay usa ka senador ang naistoryahan na niini kung asa gusto usab nga masayran ang nahitabo kang PO1 Rojas og ang kalambigitan matud pa sa mga tag-as nga opisyales sa maong investment scam.
Kahibaluan nga pagsusi sa Bomboradyo sa dagan sa gihimong imbestigasyon sa CIDG 12 og NBI-SARDO, pulos gibutyag sa nasangpit nga duha ka buhatan nga nalisdan sa pagtutok sa kaso tungod sa kakulangon og mukooperar nga mamahimong testigo.
Sa karon adunay gihuptan nga ebidensya ang pamilya batok sa ilang mga gidudahang mga tawo sa pagkawala ni PO1 Rojas.
Apan dili pa paigo nga mapasaka ngadto piskalya kung walay lig-ong ebidensya.
Nasuta nga ang tulo ka opisyales nga unang gialegaran nga utok sa pagpadagan sa PPM ang gipang-absuwelto tungod walay nakita ang piskalya nga paigong basehan aron pasakaan og tukmang kaso ang mga nasangpit.
