GENERAL SANTOS CITY – Gikumpirma ni Vice Mayor Xavier Bayan sa Polomolok, South Cotabato nga kasamtangan naka-lockdown ang Sangguniang Bayan gumikan nagpositibo sa COVID 19 ang usa sa staff sa konsehal.
Matud ni Bayan nga sa miaging Oktobre 6, 2020 nagsugod ang lockdown og mahuman sulod sa 14 ka adlaw.
Luyo niini padayon ang ilang trabaho kung asa may virtual nga session nga gihimo.
Sa iyang pamahayag nga isip precautionary measures sila tanan ang gipailawom sa quarantine.
Kahibaluan nga kapin na sa 100 ang kumpirmadong kaso sa COVID 19 sa Polomolok.
Ang nasampit nga lugar ang usa sa unang dapit sa Region 12 nga nagdeklara nga may local transmission sa maong virus.
Ang LGU sa Polomolok ang walay puas ang panawagan sa katawhan nga magkooperar gumikan dili kaya sa mga opisyal ang pagkontrola sa pagkatag sa COVID 19 kung wala ang kooperasyon sa katawhan.
