GENERAL SANTOS CITY – Daghan ang nangandoy nga sila ang makadawat sa sunod nga hinabang nga ihatag ni Sen. Manny Pacquiao.
Kahibaluan nga gipilahan sa mga residente ang mukapin sa P1 million nga hinabang nga gihatag ni Sen. Pacquiao alang sa 220 ka pamilya nga nagpuyo sa Pacman Village, Purok Quilantang, Calumpang niining dakbayan.
Nasusama sa fiesta ang pag-abut sa senador kuyog sa igsuon nga si OFW Family Partylist Rep. Bobby ug asawa nga si ABC President Lorelie Pacquiao sa lugar.
Matud ni Kapitan Lorelie nga matag pamilya nakadawat ug tag usa ka sako sa bugas ug tig P1,000.00 cash.
Samtang nahatagan usab ug tag P500.00 ang matag indibidwal nga atua sa lugar nga nakit-an sa senador.
Gikabutyag usab nga sagad sa mga residente sa maong lugar ang kanhi nagpuyo sa ilawom sa tulay sa Purok San Roque ug sa Lower Makar nga sakop sa barangay Labangal nga ilang girelocate ug gihatagan ug pinuy-anan sa lugar.
Miaging semana gibisita usab ni Sen. Pacquiao ang Pacman Village sa Alabel Sarangani ug nanghatag usab ug bugas ug cash sa mga residente.
