GENERAL SANTOS CITY – Ipatuman ang pagsirado sa Antonio C. Acharon Memorial Park atol sa pagsaulog sa Kalag-kalag.
Kini ang gikumpirma ni Mary Ann Tan Bacar, labaw sa City Housing and Development Office kung asa sumala sa nasampit magpaabot na lamang og executive order gikan sa mayor.
Matud pa niini, ubos sa maong kamanduan ikonsidera usab ang mga pribadong sam-ang sa syudad.
Sa pamahayag ni Bacar, dili limod nga atol sa All Saints og All Souls Day, dili kapugngan ang pagdagsa sa mga tawo tungod gawas nga muduaw sa lubnganan sa ilang minahal sa kinabuhi, nagatagbo ang magpamilya nga gikan sa lagyong lugar.
Gidugang pa sa opisyal, posibleng sirado ang mga pribadong sementeryo sugod Uktobre 31 hangtod Nobyembre 2. Hinuon tugtan na nila makabisita sa ACAMP ang mga tawo sugod Uktobre 15.
Sa pamahayag pa ni Bacar, dili muobos sa 5000 katao ang magtapok sa dakong krus sa ACAMP atol sa peak hours panahon sa kalag-kalag, samtang sa dili peak hours, anaa sa 500 katao ang magtapok sa lugar kung asa klaro nga dili masunod ang social distancing.
