GENSAN- Gipadayag ni political analyst Atty. Rey Cartojano nga kinahanglang matubag ni financial forensic analyst Atty. Alexander Cabrera sa cross-examination ang gigikanan sa mga dokumentong gigamit sa iyang financial analysis bahin sa giingong wala madeklara nga bahandi ni Vice President Sara Duterte ug sa iyang bana nga si Atty. Manases Carpio.
Matud ni Cartojano, kinahanglan ipatin-aw ni Cabrera kon giunsa niya pagkuha ang mga ‘source documents’ ug unsa ang iyang basihan sa pag-abot sa mga kantidad nga iyang gipresentar sa impeachment trial.
Kinahanglan usab niyang ipasabut kon giunsa pagkonektar ang mga rekord sa bangko, mga dokumento sa buhis ug Statement of Assets, Liabilities and Net Worth o SALN sa mag-asawa.
Gipunting ni Cartojano nga ang mga rekord sa bangko ug sa Anti-Money Laundering Council nagpakita sa paglihok sa kuwarta, apan kinahanglang klarohon kon unsa ang basihan sa pag-ila sa gigikanan niini ug sa konklusyon bahin sa giingong wala madeklarang bahandi.
Gipadayag kaniadto ni Cabrera nga mokabat sa P817.87 million ang giingong wala madeklarang mga kabtangan ug kita sa mag-asawa gikan sa 2022 hangtod 2025.
Busa, importante nga mapaklaro ni Cabrera ang iyang pamaagi sa pag-analisar, ang mga dokumentong nagsuporta sa iyang mga konklusyon ug ang koneksiyon sa matag ebidensiya sa mga alegasyon batok sa Bise Presidente.
