GENSAN- Gikuwestiyon ni Atty. Rey Cartojano ang tambag ni Pangulong Ferdinand “Bongbong” Marcos Jr. sa publiko nga mangandam og mga balde alang sa pagkolekta sa tubig-ulan isip pagpangandam sa gipaabot nga Super El Niño.
Sumala kang Cartojano, daw yano ra kaayo ang maong tambag nga gikan sa Pangulo kay bisan ang usa ka amahan sa pamilya makahimo man usab sa paghatag og susamang pahimangno.
Matud pa niya, mas gipaabot sa publiko gikan sa Presidente ang dagkong lakang ug konkretong mga solusyon sa gobyerno nga makatubag sa posibleng epekto sa Super El Niño.
Gipunting ni Cartojano nga daghan pa unta ang mahimong buhaton sa gobyerno aron maandam ang nasud sa hulga sa grabeng kainit ug kakulang sa tubig.
Alang kaniya, dili lamang ang pag-andam sa mga balde ang angay tutokan, kondili ang mas lapad ug dugay nga solusyon aron matubag ang mga posibleng problema nga atubangon sa nagkadaiyang sektor.
