GENSAN- Boluntaryong misurender sa kapulisan ang usa ka 19 anyos nga lalaki human gituohang nanunggab sa usa ka 20 anyos nga trabahante sa Century Tuna sa Gateway, Purok 24, Barangay Fatima, General Santos City, alas-5:30 sa buntag ning Oktubre 12, 2026.
Giila sa kapulisan ang suspetsado nga si Jeric James Otero, ulitawo ug residente sa Purok Placida, Barangay Calumpang, samtang ang biktima mao si Marlou Saquin, 20 anyos, ulitawo ug trabahante sa Century Tuna nga nagpuyo usab sa maong lugar.
Base sa inisyal nga imbestigasyon, nag-inom ang biktima uban sa iyang mga higala sa usa ka lamesa sa dihang miduol siya sa lamesa nga giokupahan sa suspetsado. Misunod ang mainitong panaglalis tali kanila nga giingong misangpot sa pagpanunggab sa biktima.
Human sa insidente, giubanan sa duha ka higala ang biktima pauli sa ilang balay. Pag-abot didto, gipukaw niya ang iyang mga ginikanan ug gisultihan sa nahitabo, sa wala pa siya gidala sa Dr. Jorge P. Royeca Hospital alang sa pagpatambal.
Alas-6:00 sa buntag, personal nga mitungha sa police station ang suspetsado uban sa iyang mga ginikanan ug boluntaryong mitugyan sa mga otoridad kalabot sa insidente.
Gihangyo usab sa kapulisan ang biktima nga kuhaon ang gikinahanglang medical ug medico-legal certificates aron madokumento ang iyang mga samad.
Nagpadayon ang imbestigasyon aron matino ang tibuok nga mga sirkumstansiya sa insidente ug ang tukmang legal nga aksiyon nga ipahamtang sa suspetsado.
