Patay ang broadcast journalist nga si Adrian “Golden Boy” Loterte human gipusil sa wala pa mailhing mga suspek sa Daraga, Albay niadtong Lunes sa hapon, Oktubre 12.
Nahitabong ang pagpamusil sa bakery ni Loterte sa Barangay San Roque, Daraga, diin kalit lang siyang gipusil sa usa sa duha ka suspek pasado alas-4:10 sa hapon, sa wala pa, miikyas ang usa sa sakay sa motorsiklo padulong sa Barangay Kimantong.
Gidala dayon si Loterte sa Daraga Doctors Hospital apan nakabsan kini sa kinabuhi pasado alas-5:00 sa hapon tungod sa mga samad nga iyang naangkon.
Gimandoan sa Police Regional Office 5 ang Special Investigation Task Group nga manguna sa imbestigasyon ug maningkamot nga madakpan ang mga suspek sa krimen.
Gisusi na usab sa mga otoridad ang mga kuha sa closed-circuit television o CCTV samtang nagkuha og mga pahayag gikan sa mga nakasaksi sa pagpamusil. Nagpatuman na usab og mga checkpoint sa mga kasikbit nga lugar.
Gisusi pa sa mga otoridad ang posibleng motibo sa pagpamusil.
Nagsilbi si Loterte isip online news anchor sa RBN News Television Rabas Cun Rabas.
May kalabotan niini, hugot nga gikondena sa Albay Press Club ang pagpatay sa maong mamamahayag ug miduyog sa panawagan nga makab-ot ang hustisya alang kang Loterte pinaagi sa ilang opisyal nga pahayag.
Nanawagan usab ang grupo sa Presidential Task Force on Media Security (PTFoMS) nga moapil sa imbestigasyon sa krimen.
“We also urge the Presidential Task Force on Media Security (PTFoMS) to extend its assistance and work closely with law enforcement agencies in investigating this attack and ensuring accountability for the crime committed against a member of the media,” matod ni Albay Press Club President Edwin Peralta.
“Violence has no place in a civilized society. No journalist or media practitioner should have to fear for their life while performing their duty to inform the public. Attacks against media workers are not only attacks on individuals but also threats to press freedom and the public’s right to know,” dugang pa niya.
Samtang, giawhag sa lokal nga kapulisan sa Daraga ang publiko nga likayan ang pagpakaylap sa mga impormasyon bahin sa krimen nga wala pa mapamatud-an, lakip na ang pagpakaylap sa mga video o litrato sa pagpatay.
