Patay ang usa ka glass installer human aksidenteng nakuryente samtang nagtrabaho sa FVR Village, Purok 39.2, Barangay Fatima, General Santos City kagahapon sa hapon, Oktubre 11.
Giila ang biktima nga si Renjie Lopez Magdadaro, 39 anyos, minyo ug residente sa Purok 28, Ricville, Barangay San Jose, Gensan, nga nagtrabaho sa SBU Glass and Construction Supply.
Base sa inisyal nga imbestigasyon sa Police Station 7, nahitabo ang insidente alas-1:17 sa hapon samtang nagbuhat sa iyang trabaho ang biktima, dihang aksidente siyang nakahikap sa buhi nga alambre sa kuryente.
Gidala dayon siya sa GMC Hospital aron mahatagan og medikal nga pagtagad, apan gideklarar siyang dead on arrival sa doktor nga midawat kaniya.
Sumala sa iyang amo nga si Pilito Bruce, sila ang nagdala sa biktima sa maong ospital human sa insidente.
Samtang, gipadayon pa sa kapulisan ang imbestigasyon aron matino ang tanang sirkumstansiya sa insidente ug ang angay nga sunod nga aksiyon.
